चिसापानीमा ऐतिहासिक ल्होसार पर्व सम्पन्न
नगेनन्यूज डटकम, कन्चन गुरुङ्ग, रुपाकोट, २१ पुस । कास्की, रुपाकोट–३, चिसापानी गाउँमा पुस १४ दखि १६ सम्म तीन दिने ल्होसार पर्व भव्यताको साथ र रंगयात्रा कलाकृति प्रर्दशनी सम्पन्न भएको छ ।
चिसापानी तमु समाज यू.के. को प्रायोजनमा गरिएको उक्त कार्यक्रम सफल पार्नको लागि ऐतिहासिक तमु ल्होसार पर्व–२०७३ चिसापानी मूल आयोजक समिति गठन गरिएको थियो । कार्यक्रमका प्रमुख अतिथि नेपाल सरकारका मुख्य सचिव डा. सोमलाल सुवेदीले तमु ल्होसार पर्व अहिले आएर सद्भावको पर्व बन्न गएको बताउँदै गाउँ विकासको लागि आफ्नो व्यक्तिगत दृष्टिकोणले नभई उपभोक्ताको आवश्यकतालाई ध्यानमा राख्नु पर्ने र आपूmले के गरें त ? भन्ने प्रश्न आफैंले आफैंलाई सोध्नुपर्ने बताए ।
रुपाकोट रिर्सोटका संचालक पुष्पराज पगेनी, रुपाकोट पोखरा सम्पर्क मञ्चका अध्यक्ष खेम बहादुर तमु लगायतका विशेष उपस्थिति रहेको यस कार्यक्रममा पूर्व सभासद् कृष्ण बहादुर तमु, चिसापानी कृषि सहकारी संस्था लि. का अध्यक्ष किसान तमु, तमु प्ये ल्हु संघ केन्द्रीय सह–कोषाध्यक्ष कन्चन तमु, चिसापानी तमु समाज यू.के.का अध्यक्ष बुद्धि बहादुर तमु, पूर्व प्र.अ. नोयन्द्र तमु लगायतले मन्तव्य राखेका थिए । कार्यक्रममा नगेन आर्ट ग्यालरी सैनिक शाखा, नगेनस् स्टूडिएट क्लव अफ हिलपोइट, नगेनन्यूज डटकम र नगेन फन क्लब अफ् लेखनाथद्धारा बनाइएका यसै गाउँ सम्बन्धी विभिन्न दृश्यका चित्रकला प्रदर्शनी पनि गरिएको थियो ।
रंगयात्रा कलाकृति प्रर्दशनीमा कलाकारहरु बिश्व कलायात्री प्राज्ञ सभाषद नगेन सिहं ठकुरी, बाबुराम कस्केली, विजय गुरुङ्ग, सन्जिना गिरी, सारा बजिमय, आकास जैसवाल, प्रमिला लामिछाने, जानुका के.सी., सुस्मा गौतम, सहबिर गुरुङ्ग लगायत १० जना कलाकार सहभागिता भएका थिए ।
प्र ल्हो (बाँदर वर्ग) लाई विदाइ गरी च्ह्य ल्हो (चरा वर्ग) लाई स्वागत गर्ने यस कार्यक्रममा तमु संस्कृति अनुसार खेगी गुरुद्धारा रिपा आयु गरिएको थियो भने २४ जना ज्येष्ठ नागरिक, १८ जना स्वदेश तथा विदेशी फौजमा उच्च पद्वी प्राप्त व्यक्तिहरु, समाजसेवीहरु २ जना, खेगीहरु (पैंडी र लामा), खेलकूदमा ख्याती कमाएका व्यक्ति तथा स्वदेशी व्यवसायीलाई खादा लगाई सम्मान गरिएको थियो भने प्रायोजक संस्थालाई प्रशंसा पत्र प्रदान गरिएको थियो साथै पुरानो संस्कृति ख्याली नृत्य लगायत विविध साँस्कृतिक कार्यक्रमद्धारा भरपुर मनोरन्जन गरिएको थियो ।
समितिका संयोजक धन बहादुर तमुको अध्यक्षतामा सम्पन्न यस कार्यक्रमको उद्घोशण सचिव केश बहादुर तमुले गरेका थिए भने हिम दृश्य क्लब चिसापानीका अध्यक्ष विशान गुरुङ्गले स्वागत गरेका थिए ।
धेरै भक्तजनले आस्था राख्ने प्रसिद्ध चिसापानी देवीको काखमा, रुपातालको शिरमा, अन्नपूर्ण हिमश्रृङखलाको अगाडि नतमस्तक भई थपक्क उभिएको यो रमणिय चिसापानी गाउँ रोयल ट्रेकको रुटमा पर्दछ ।
0 comments
Write Down Your Responses